Leef graasboere en graasboerinnekes,

Geine kaetel mit graasboere sop
mer prins Luc de twieëde, mit eine sjteek en vaere oppe kop
Gebaore in Bor, mer al gauw nao Zöstere verhoes
'n prachtig dörp. Hiej veul ich mich thoes


Twieë geweldige dochters, Eef en Babs, ‘ne sjoane mix van mich en Nelke
Sjpeel gaer mit hun en tösjedoor mit ein tennisbelke.
Oug jaorelang gebasketbald, mer waat hungk dae ringk wiet baove de kop.
Kreeg oeteindelik hoogtevrees op det leierke en bön toen mer gesjtop.
Fitserenne vènj ich ouch geweldig... eine kieër per jaor.
De ‘toer de Hook’, luuj waat is det zjwaor.
Mer mit Coot, Mike, Jan en natuurlik de toermisse sjpele weer 't elk jaor weer klaor.

Wirk in Rotterdam biej de Mars en riej hieël get op en neer.
Oug soms te vènje op anger planete..., mer den kump 't door ’t beer.
Bön neet einkènnig en drènk oug gaer 'n glaeske wien.
Mit de jonges van de wienklub, altied sjaele kal, en aaf en toe get koppien.

Vastelaoves– en duitsje schlagers, ich hauwt van gezellige meziek
En heur ich Vicky, den bön ich neet de prins mer de keuning te riek

Groat fen van ZH “rek 't neet den sjeurt ’t waal”.
Super initiatief, geweldige groep, fantasties kabaal.
Mer mien groatste passie is mien zaate hermenie: “Zaateweg”.
Dao sjuuf ich hieël get valsje boeknoate weg.
En es prins van dit graasboerriek höb ich ’t vertroewe,
det Zaateweg en vrunj eine sjoane wage zulle boewe.
Dae mich en mien gevolg door Zöstere zal trekke,
veurop gegange door nog mieë vasteloavesgekke.
Mer boewe zónger mich, det is veur uch toch niks gedaon.
Want waem mót noe plinteleierkes biej de Gamma zeuke gaon?

Genóg , ich gaon mien proklamasie aafsjloete,
mer zónger boodsjap gaot geer neet nao boete.
(“drie daag knoaje mit dae roaje” haet ’t neet gered …)
‘ne Daag neet gelache, is 'ne daag neet gelaef.
Gank oet de bol, geneet van dees daag.  
Ich vroag uch, gesjtèrk door dees patsj en vaere.
Laot ’t eine sjoane vastelaovend waere.
Jederein op zien eige meneer, mit zien eige sjtökske meziek
veur 'n groat bóntj fieës in ós Graasboerriek.
Dus mit de volgende weurd sjloet ich aaf:

“Laot mer sjuuve ! Alaaf, alaaf, alaaf."